【新增動新聞】
港超球隊東方龍獅嘅亞冠盃G組對手之一、中超勁旅廣州恒大，喺周五中超作客爆冷1:2輸畀山東魯能，開季首嘗敗績之餘，上場聯賽被逐嘅中場鄭智更被賽會追加停賽一場，下仗對上海上港嘅前列牙骹戰繼續坐波監，搞到教練史高拉利跳晒掣，暗斥有陰謀！

恒大呢場波有個好開始，中場黃博文主射罰球射中人改變方向入網開紀錄，但魯能下半場靠巴西孖寶發威，基爾拿斯文圖同迪亞高泰迪利各建一功，主場反勝2:1。恒大下周二就要出戰亞冠盃第3場分組賽作客日聯川崎前鋒，鄭智可望復出，但佢喺上周對北京國安嘅聯賽後疑因不滿裁決留喺後備席唔走，結果俾賽會追加停賽一場，4月1日主場對上港嘅聯賽唔使預佢，「大菲」喺周五賽後就忍唔住發牢騷：「鄭智被逐後唔舒服，所以喺後備席敷冰，咁樣被追加停賽，同可能斷送郜林職業生涯嘅飛鏟一樣。或者睇吓下一場我哋同邊個踢，你就知道點解會有咁樣嘅處罰。」

大菲行走江湖多年，連方丈都夠膽得罪，但佢對輸波都唔係冇責任，因為恒大開季17日內踢咗5場波，竟然有8位球員正選踢足5場，堂堂中超班霸都唔輪換，成何體統呢？