Blogpaper:
Foodofthegods品神

蘋果日報 2008/03/11 00:00


要講關於朱古力的故事,我估三日都未必講得完。18世紀,植物學家Carolus將可可樹稱為"FoodoftheGods"神的食物,吸引力之強、公道的味覺叫你難以撒賴慳荷包。不知從何時起,朱古力要貴先好食已經唔係問題。今日只想找出貴的答案,但求日後朝聖進貢,品嚐這種神之食物時,都更心安理得啫。

攝影:陳盛臣

http://appleblogpaper.blogspot.com
aboutme:花樽
明明係英文名,但俾人譯了日文,幫日本公司打完工,多了個名叫「花樽」。至於本身英文係乜,自己諗。太愛吃、食不停、有機會周圍去,都立定有得食好食的宗旨。永遠銘記到年紀大要戒口時,就真係想吃恨遲。
empty
越貴越好食
人好似一出世就會喜歡朱古力,你有無見過有細路唔鍾意食?
香港人特別怕甜,我亦不例外,因而走上只食DarkChocolates之路。去過多個國家,講起朱古力,我會想起澳洲。一間可以飲即溶朱古力粒的MaxBrenner、超級市場內,亦有多到你會感到有選擇性恐懼的朱古力架,絕對教我這個朱古力人興奮難捨。
香港人的朱古力文化,比起澳洲、歐洲等地真係遲得太多!20年前有粒金鷹在手,已經好開心。後來有金莎出現,大家開始逐漸有要求,加埋中國人的傳統思想,金碧輝煌的金莎近10年於新年檔可謂跑贏幾條街。
empty
■可可有着一種令人不停追求更好的魔力。
再要食得高層次一點,去到海港城Shopping,都會留意到有間See'sCandies傳出陣陣的朱古力香。但當年捨得登門破費的人卻始終不多,這間白雪雪小店,似乎被標籤咗為有錢人而設。
近年一個又一個的貴價朱古力品牌殺到,捨得用10幾蚊買粒朱古力的人,似乎越來越多。人龍對GODIVA同Royce特別情有獨鍾,起初都批判港人的羊群心理又發作。但問到精打細算的老友Michelle每星期$20嘅朱古力習慣:「開頭為咗結婚先買GODIVA食,但食食吓都返唔到轉頭,由$110/100g食到$130/100g,發覺真係越貴越好食。」朱古力的獨特,就係建基於令你味覺無法回頭的法則。
empty
■由童年時的金鷹,到現在大熱的GODIVA,人對朱古力的講究已經凌駕於金錢之上。
朱古力價位有數計
眼見連不太講求生活質素的流氓男同事,食完GODIVA都誓不肯再食超市朱古力,我理解朱古力有導人升仙的力量。
大家開口埋口都GODIVA,點解咁貴?永遠只識答「好味」兩字。早兩日收到盒VERO,無論味道同包裝,都令我以為係歐洲出品。更令我驚訝的係到期日:「嘩!你買咗好耐㗎喇?仲有兩個禮拜到期!」Cara一口寃氣:「啱啱新鮮出爐㗎!頭先經過你屋企前,經過我老友Roger間Workshop,入去順手買盒你試呀!」聽到朱古力工場近在咫尺,立刻面懵懵去朝拜。
empty
■朱古力到期日好短,Roger:「你食生蠔,會唔會放幾個禮拜先食吖?」
VERO老闆Roger:「好唔好味朱古力要靠自己品嚐,但靚唔靚嘅朱古力就一定有得睇。全世界嘅可可豆分三大類,最貴係得5%產量嘅Criollos,其次係10%嘅Trinitarios及85%嘅Forasteros。所有可可生產地都喺赤道附近,最靚嘅來自委內瑞拉。雖然靚可可係重要元素,但新鮮都好緊要。」真係冇諗過。「可可要新鮮,奶都要新鮮,所以我堅持用FreshCream、Vanilla同CocoButter。大品牌想減低成本,都會用MilkPowder同菜油。樣樣新鮮,快過期,朱古力自然會貴。」下次買朱古力,即使貴,我都起碼識Challenge,睇吓係咪使得其所。
empty
■Roger認為有創意毋須太花巧。玻璃樽裝即冲朱古力粒$300/樽
《Wallpaper》話「來港必試」
除了新鮮,Roger經常用Artisan這個字掛在口邊,視生產朱古力為藝術品,堅持小工作室製作控制質量。五年前因為老婆一句「香港冇好朱古力」,兩公婆飛去意大利學整朱古力,更偷雞請世界級品牌朱古力師傅來港訓練員工。Roger對朱古力的誠意,能由他香而不甜膩的藝術品所感受。他更因此得到國際的認同,除不少一級品牌、大公司來港和他合作,《Wallpaper》於06年5月號,更將買VERO朱古力列入五件來港必做的事。
empty
■小工作室位於上環,堅持手工藝形式生產。
莫講他不停強調VERO係香港最好味朱古力,連我呢一刻都感到他能為港增光而自豪。八卦的我立刻追問他對其他品牌睇法,他充滿信心:「GODIVA都係大量生產,大賣品牌係比利時朱古力。但有幾多真係於比利時生產就無謂講,只可以話佢嘅Marketing做得好好。我𠵱家感染到身邊個個人飯後一粒朱古力,佢都係食VERO。」今日一課,我的確開始轉軚投入VERO教。將朱古力帶回公司傳教,個個都大叫好味。尤其他的70%黑朱古力,在此呼籲大家一句「真的不能不試」。
empty
■Roger曾為多個品牌如BVLGARI、LAPERLA等生產VIP禮盒朱古力。
最新回應
Roger:食朱古力唔一定係女仔專利,有時攰攰哋食粒朱古力,個人真係會輕鬆好多。不過朱古力就真係唔多健康,次次食完都生暗瘡,所以都唔敢食多。
empty
Meeco:朱古力真係有種魔力,最好日日都食,不過我怕肥。細個真係對朱古力唔係幾講究,但大個咗,都會買啲靚朱古力食,𠱁下自己開心。
empty
Stella:有時口淡淡,真係會好想食粒朱古力,尤其係朱古力甜品,莫講話食,見到都開心。我覺得最好食係瑞士朱古力,但新唔新鮮呢個問題,又真係冇諗過。
相關超連結
除了金鐘太古廣場連卡佛有店外,VERO主力做網上訂購的送貨服務。買滿$500就可以免費送貨,人客可自行Order喜歡的套餐。

http://www.verochocolates.com
empty
這個70%的朱古力網址,有大量關於朱古力的歷史、資料及討論,更有多個不同品牌的朱古力訂購,值得朱古力門徒一看。

http://www.seventypercent.com
empty
查詢:VERO(25595882)