當年今日

魚缸暴炒族:寒流加劇 中燃受惠 - 方星俠

蘋果日報 2010/01/05 00:00


以往普羅散戶十分注重所謂新年首日「紅盤」高低,認為係全年股市一個指標,但如果睇真點,紅盤升或跌都好,唔一定對全年大市有影響。以新年第1日股市升跌來判定全年市況,係無稽定膚淺,理性散戶應心中有數。
新一年首個交易日,散戶未全面歸位,證券行見唔到太多人,呢種市況最好炒股不炒市,因為唔跟指數走之股份,在呢種市況分分鐘有驚喜,如果有關股份配合到市場話題,更加值得留意。
內地寒潮進一步升級,北京氣溫都跌至近零下20度水平,幾十年都未見過,可見今年冬天比以往更凍,估計全國民眾對天然氣需求大增,燃氣股短線應有炒作價值。好似中油香港(135)昨日爆升7%,收報11.04元,創52周新高。相信另一隻中國燃氣(384)將有追捧,昨收4.31元,升1.65%,股價即將衝頂,首站目標看4.80元。
中燃中期純利4.31億元,較上年同期7583萬元,大增4.7倍,其中包括特殊項目收益2.14億元,亦受惠於天然氣銷量大升,內地天氣太凍,預期天然氣銷量有增無減,利好中燃。
方星俠