當年今日
關於我們

煙花賀歲:
勁放16,688枚唱好香港初二煙花全攻略

蘋果日報 2004/01/23 08:00


總共有十幕的年初二煙花,由香港新界工商業總會贊助,整個贊助金額為500萬港元。而整個煙花主題則是「靈猴躍動香江百業旺 新界工商禮花賀新歲」。全程歷時23分鐘的煙花滙演,總共會發放16,688枚煙花,平均每分鐘就會發放725枚煙花,淨係聽聲都已經夠晒震撼!而煙花款式就同往年大家睇開嘅「大爆炸」式煙花差唔多,不過今年就多咗玩顏色,唔單止有五顏六色,重有罕見嘅全白色煙花。

推介必睇位
必睇1:麻雀筒子搬上天
新正頭梗係要吉吉利利,最緊要就係大家都搵多啲,所以第二幕主題係「財源廣進」,講嘅唔係人人有工開,或者閒時中吓馬仔、波仔之類,而係環繞大家新正頭最熱門活動之一──打麻雀!而第二幕就祝大家新正頭打麻雀贏多啲,所以煙花款式亦以「筒子」為主,每個「筒子」都由幾個圓圈煙花組成,就算唔識打麻雀都一樣可以睇得咁投入。除了「筒子」之外,重會有「心心」同「星星」相伴,代表着「心心相印」及「星星閃光」,想睇吓「筒子」點樣變成煙花,呢一幕絕對唔可以錯過!
必睇2:有情人鍾情煙花
通常煙花滙演最後一幕先認為係最精采一幕,因為多數都會嚟過「大晒冷」,不過喺大晒冷之前,一段溫馨浪漫嘅序幕就絕對唔少得。而第九幕以迎接元宵為主題,名為「花好月圓」,顧名思義就知呢幕以有情人為主要對象。除咗有紅、藍、綠色煙花之外,更會有白色雪花形煙花,簡直就特別為一對對情侶而設,相擁依偎睇住巨型白色大雪花天上發放,襯埋滿地白色閃閃小煙花,直頭好似置身雪地之中,就算唔可以同愛人過白色聖誕,喺呢一幕都可以補番晒數!
必睇3:太空主題紀念升空
除了以新春活動作為煙花主題之外,03年大事亦被收錄在內,當中最令香港人瘋狂的首推太空熱潮,令到中國首位太空人楊利偉喺香港人氣急升,如此大事當然唔少得拎嚟做煙花主題。而第六幕就以「凱旋而歸」為主題,搶眼之處在於煙花以白色為主,於半空中猶如水銀瀉地,對睇開五顏六色、七彩繽紛煙花的香港人,的確極有新鮮感!再加上彗星煙花會於低空同步爆發,就好似一顆顆流星喺眼前掠過。現場睇嘅重會有《太空漫遊》為背景音樂,此時此刻有如置身太空之間!
十幕煙花主題
第一幕:動感之都
第二幕:財源廣進
第三幕:CEPA機遇
第四幕:闔家同歡
第五幕:衝刺
第六幕:太空漫遊
第七幕:冒險勇闖
第八幕:大放異彩
第九幕:花好月圓
第十幕:香江興旺
至正觀「花」位
雖然煙花認真正,不過若然搵唔到個靚位嘅話,煙花幾靚都冇你份,𠵱家就即刻醒你幾個靚地方,可以安安靜靜舒舒服服咁欣賞煙花。

世貿麥記平靚正
一個字「平」,論經濟又實惠真係別無他選,$20個餐畀你睇足成個維港煙花,講嘅就係銅鑼灣世貿中心嘅麥當勞,向海位全部都係無敵落地大玻璃,唔使企喺街食風,舒舒服服睇足全程,當然就係先到先得!
電話:25779125
地址:銅鑼灣世貿中心商場209B-210舖
天台睇煙花頭頂爆
維港沿線都係睇煙花嘅勝地,不過想坐得安安樂樂,邊食邊睇嘅話,多數都係要幫襯各大酒店CoffeeShop嘅自助餐,不過煙花「佳節」當前,每人冇三、四百蚊都唔使旨意落樓。但係凡事總有例外,位於灣仔藝術中心六樓嘅「雅廚」,當晚就有燒烤自助餐提供,超靚景加埋自助餐都係$278一位,比去酒店經濟得多,而且重有露天座位選擇,直情可以睇住啲煙花喺正個頭上面爆。
電話:28272923(雅廚)
地址:灣仔港灣道2號香港藝術中心6樓
收費:$278(成人)?$138(11歲或以下)*設有加一收費
傳統「觀點」無法代替
雖然眾多酒店、餐廳都可以畀人舒舒服服咁睇煙花,又或者索性喺屋企睇唔使迫,之但係點解每年放煙花都仍然會吸引過萬人到海旁兩岸睇煙花,重要迫餐飽、兼且等幾粒鐘咁辛苦都要喺度睇?皆因除了景觀夠靚、唔使錢之外,氣氛更加係重要原因之一,每當睇到精采之處,萬人狂「嘩」嘅震撼程度真係別處無法代替,只有親身感受才會永世難忘,所以講睇煙花位置絕對唔少得海旁兩岸!
影煙花必殺配備
每年放煙花亦都係各大影友出動嘅時候,不過對普羅大眾嚟講,大部份去影煙花嘅都係「輕裝上路」,不過其實只要加少少器材,輕便式數碼相機都一樣可以影靚相!

Wide鏡知多啲
一般數碼相機鏡頭都唔會用上太廣闊的鏡頭,想張相影得闊啲,平時都話可以行後幾步,不過睇煙花時候人迫人,莫講話想行後幾步,直情轉身都有困難,所以幫部數碼機加個廣角鏡(俗稱Wide鏡)就可以影得更加多,一般價錢由幾百到千多元左右。不過並非所有數碼相機都可加裝廣角鏡,而且廣角鏡亦因直徑大小而分有不同級別,購買前應先向所屬相機代理查詢,否則就得物無所用。
防手震用腳架
影夜景最緊要手定,因為夜景光線弱,需要曝光時間亦較長,相機就會自動將快門調校至1秒或以上,所以影嘅時候最好用腳架將機身固定,否則影出嚟就只會「蒙郁鬆」煙花。而市面上亦有多款大大小小腳架款式,用家可因應自己需要選購。舉例如放在石上拍攝,則可以用小腳架,若果是放在地上拍攝,則應該考慮使用較大及伸縮節數較多的腳架。
黑卡令煙花更多
利用黑卡影煙花向來都有,因為以往單鏡相機設有B掣(即快門長開),所以在煙花與煙花之間的空檔時間利用黑卡遮擋鏡頭,控制曝光次數及時間。而較新式及高階的數碼相機多數都設有全手動模式,雖然未有B掣功能,不過快門時間亦可以長至三數十秒,足夠一次過影下多個煙花,造出一張相內有十多個煙花綻放的畫面。