今屆「2009年亞洲小姐競選」候選佳麗噚日到佐敦試戴首飾同冠軍后冠，準決賽呢個月24號舉行，總決賽就喺下月初。大會以抽籤形式選出幸運佳麗試戴冠軍后冠，結果嚟自台灣嘅20號董汶宜有幸試戴，佢試戴完後笑住話好開心，點知有記者話根據過往經驗，通常試戴后冠嘅佳麗最後都與獎項無緣。
本身係台灣北部地區決賽冠軍嘅董汶宜聽完後以廣東話講：「抽到試戴已經好lucky，我喺台灣已經戴過，一世人有一次咁嘅機會已經好好，所以家會着重過程多啲，當然我都好希望打破呢個慣例。」
有比堅尼皇后之稱嘅18號劉伊心，佢着住黑色斜膊短裙，雖然條裙唔係好性感，但有記者讚佢身材好，佢笑住話：「我都覺得條裙好靚，但好似唔夠性感，露得唔夠多。」

2號王希瑤收鑽錶

至於出身富有人家嘅2號王希瑤話好少收藏珠寶，如果有需要會問阿媽借，問佢有冇收過男友送嘅首飾？佢話：「我以前收過一隻鑲滿鑽石嘅錶，係男朋友送，家擺咗喺保險箱，但我唔會睇錢，反而着重嗰份心意。」曾被刊出多張攬仔相嘅1號莫曉菲噚日因病缺席，有報道話佢從事不道德工作，王希瑤力撐話：「我冇睇過報道，但我相信冇咁嘅事。我覺得佢好真性情，又好乖，唔會有呢啲問題出現。」