太陽喺家喺西岸排尾二，要打入季後賽唔係太樂觀，不過佢哋有一樣嘢喺NBA排第一，就係絕殺對手嘅次數最多！計埋啱啱喺周日神奇反勝塞爾特人，喺今季已經第三次完場前入波奠勝。巧合嘅係，三場波負責最後一射嘅球員，之前都係喺肯塔基大學讀書嘅。

太陽最近連贏三場，周日主場對塞爾特人，喺完場前四秒連入兩球，比歷素（Eric Bledsoe）上籃追平之後再由基斯（Marquese Chriss）偷波，最後由烏利斯（Tyler Ulis）射入三分絕殺。

太陽喺今場波之前，喺今季曾經兩次絕殺對手，上年11月主場對拓荒者，喺加時完場前由比歷素射入三分搞掂；到上月作客帝王，就靠D卜克（Devin Booker）喺剩返1秒起手中距離贏波。咁啱得咁橋嘅係，三個絕殺射手D卜克、比歷素同烏利斯，都係由肯塔基大學加盟NBA。

↓撳呢度睇太陽絕殺塞爾特人↓
http://bit.ly/2mdfCma