郭富城今日母親節，拖住方媛(Moka)喺下午約5點到中環置地行街，行咗兩個鐘終於起程返歸，總共掃咗三大袋戰利品，行到去廣場門口，有男fans上前要求合照，城城都大方答應。

離開時Moka依舊繞實城城，今日城城喺ig post咗一張「謝媽宴」菜單，菜式名有「酥蝦仔」、「塊糕長大」仲有「對妳愛不圓」等等，對母親節咁大感觸，係咪暗示有好消息？城城話：「張相搞笑，但用心嘅。」行到去扶手電梯，城城仲提醒記者小心，唔好跌到。

至於日前Moka下廚煮飯，被讚慳家（新聞連結： http://bit.ly/2pLiQvN ），城城多謝網民讚賞，仲幫太太解釋：「佢學緊廣東話。」問到城城係咪有好消息要公佈？佢就話：「未講得住。」

至於母親節難得放假，城城話原本都係拍緊電影，但就多謝電影俾假期佢，可以有個時間同家人食飯。記者問城城，今晚係咪Moka煮飯？城城開心答：「係呀，返屋企食飯喇。」