熊黛林（Lynn）呢排要做電影《葉問》宣傳，每次出嚟都俾記者追問同郭富城嘅緋聞，聽聞話電影公司唔多高興，噚日阿Lynn同甄子丹喺鑽石山做電影宣傳，提到佢早幾日同城城前後腳一齊喺機場出現，但之前喺城城去台灣宣傳演唱會時，又被指同《殺人犯》主角張鈞甯一齊去食麻辣火鍋，城城對張鈞甯仲好有好感，阿Lynn聽後睩大眼反問：「即係點？」問佢唔呷醋咩？阿Lynn話：「又唔係我嘅事，我諗唔關我事。」

只想努力拍戲

講唔夠兩句，電影公司宣傳部啲人已經係側邊猛話有冇關於電影問題要問阿Lynn，如果冇嘅話，阿Lynn就要準備上台。咁即係話佢講電影話題就好得閒，講私人嘢就變到好忙。喺阿Lynn俾人拉走前，即刻再問佢係咪私人嘢唔答？阿Lynn好客氣咁話：「想讀者睇到我好努力拍戲，有進步，唔係講無謂嘢！」
至於城城噚日就喺上海出席手錶宣傳活動，傳媒當然都唔放過佢，問到近來好多人結婚，問城城有冇結婚衝動？佢話：「我諗每個男人到某個年齡都會想結婚，尤其我係單身，不過我一日未有達成夢想，我都唔會諗結婚，𠵱家我同工作談戀愛。」