重有幾日就係普世歡騰嘅聖誕佳節，當大家正忙緊選購聖誕禮物送贈至愛親朋，千祈唔好忘記一班生活喺貧窮線下嘅孤苦老弱，佢哋喺呢個早晚天寒地凍嘅冬日，有啲淨係靠一張殘舊棉被瑟縮喺床上避寒，實在需要大家伸出援手，畀啲溫暖佢哋。
蘋果日報慈善基金月前展開一年一度「送暖行動」，迄今共接獲十六間社會服務機構申請禦寒物資，包括：棉被、毛氈、棉衣、手襪、羊毛短襪、頸巾同冷帽（見附表），蘋果基金已迅速作出回應，喺「送暖行動」專戶撥款，陸續安排送贈暖笠笠嘅衣物畀弱勢社群，受惠人士包括：獨居長者、低收入家庭、殘疾人士、籠屋戶、露宿者等。