莊思明、樂曈，仲有盧巧音（Candy）同老公蘇浩才（Sammy）噚晚旺角出席《變形金剛：終極戰士》首映禮。莊思明同樂曈一齊露膊，原來佢哋私下係朋友，之前一齊做綜藝節目，加上樂瞳又同楊明合作。樂瞳離開大台，跟莊思明又同聲同氣，佢話：「同思明傾下有咩工作做，遲啲去上海做嘢，o依家自由身好多選擇，彈性好大。」莊思明大讚樂曈係一個成熟嘅女仔，會有自己計劃。

莊思明即將舉行個人演唱會，問佢有冇唱俾男友聽，佢話：「佢梗係話好聽，正如我煮咩佢都話好食一樣。」

Candy同Sammy難得拍拖去睇首映，Sammy話最近多咗私人時間，因為家中兩隻養咗9年嘅兔仔突然病逝，Candy話好傷心，之後兩公婆可以計劃外地旅行散心，問佢哋會唔會再養寵物？Candy話唔會，Sammy話：「應該唔會喇，照顧好兩隻貓先，佢哋都十幾歲，養喺工作室，都好怕再迎接佢哋離開嗰日，養寵物對我哋嚟講係一項修練，學習脾氣、耐性同責任心。」講到生仔，佢話呢個問題我哋傾咗好耐，最後都係決定唔生，因為仲有好多工作同心願想完成。