韓國男星宋仲基自前年拍完神劇《太陽的後裔》就一直未有新作，雖然早前多次傳出佢將與《太陽》舊拍檔金智媛、《金裝律師》男星張東健合作tvN歷史新劇《阿斯達編年史》，不過tvN方面一直否認消息。

直到今日，tvN先宣佈官方消息，表示宋仲基、金智媛、張東健落實演出新劇《阿斯達編年史》，劇集係100%事前製作，所以預計下半年開拍，並於明年上半年播出。《阿斯達編年史》以虛構嘅古代都市「阿斯達」為中心，而展開嘅權力鬥爭、愛與成長故事嘅奇幻古裝劇，由《善德女王》、《六龍飛天》嘅金英賢、朴尚淵編劇共同執筆、《Signal》、《我的大叔》金元錫導演執導。至於早前有報道指韓片《惡女》女星金玉彬亦會加盟，不過官方就未有宣佈相關消息，似乎金玉彬方面亦未落實演出。

據悉宋仲基飾演嘅「銀蟾」，係接受藍色彗星之息嘅預言之子，失去雙親後獨自一人喺非議中長大，有住異於常人嘅外貌、性格、能力，日後成為阿斯達嘅征服者。金智媛飾演懷著藍色彗星之息而生嘅預言少女「譚雅」，係「銀蟾」嘅初戀，至於張東健飾演嘅「塔昆」就係阿斯達帝國嘅第一位王。

宋仲基、金智媛等人落實演出新劇，令粉絲都相當期待，加上其演員老婆宋慧喬之前亦落實與朴寶劍合作新劇《男朋友》，雙宋夫婦同時回歸公仔箱都令外界相當關注。另外，喬妹代言嘅護膚品牌今日再公開其新相，大晒白滑肌膚。

更多韓流，喺晒《娛果》
http://fb.com/appledailyent