第52屆台灣電視金鐘獎今晚喺台北國父紀念館舉行，今屆迷你劇集競爭非常激烈，而當中《通靈少女》一劇更由播出開始已經成為話題之作，連台灣總統蔡英文都曾經讚揚作品，播出後更加創出電視台收視最高紀錄。

《通靈少女》由E Cup前o靚模郭書瑤主演，故事包含台灣本土民間信仰及宮廟文化，故事講述一名具有通靈能力嘅少女如何平均喺高中生及「仙姑」兩者身份嘅成長故事，利用台灣獨有嘅宗教元素配合靈異事件探討人性、慾望，從而令到主角內心真正成長。

《通靈少女》喺金鐘獎開鑼前已經備受注目，劇集亦不負眾望喺女配角獎項及迷你劇集獎項奪魁，不過可惜女主角郭書瑤就失落迷你劇集女主角獎項，女主角獎最終由《最後的詩句》嘅溫貞菱奪得。