當年今日
關於我們

【你未出世我就唱喇】12歲阿仔唔信老竇做過歌手 黃翊回歸樂壇表演

蘋果日報 2017/05/26 16:55

黃翊

歌手黃翊相隔20年回歸樂壇,近10幾年專注大牌檔生意嘅黃翊(新聞連結: http://bit.ly/2qVzEnv ),近日重回電視螢幕,並再走入錄音室灌錄新歌。
黃翊話:「呢十幾年做大牌檔,之前賣過T裇,再早期就喺大陸登台,再入錄音室分別唔大,但係未搵到發行商,好多嘢要自己做。」黃翊話大牌檔上咗軌道,12歲嘅仔又開始可以照顧自己,所以o依家自己可以抽身重投歌壇,對於重拾歌手身份,佢話阿仔從來唔知自己係歌手:「我俾我嘅報道佢睇,佢好cool望一眼就算,佢唔係好信爹哋係唱歌,亦冇聽過我嘅歌,因為我唔鍾意懷緬過去,自己都冇聽自己嘅歌。」
黃翊表示,直至最近薛家燕生日,家燕姐搵佢喺生日會上拉埋囝囝一齊吹色士風表演,為家燕姐演奏生日歌,佢話:「阿仔初時拒絕,我用download game同佢交換條件,佢之後努力練,但去到表演時,佢心跳腳震好緊張,最後竟順利完成,令我好意外。」佢仲話o依家不時帶埋囝囝去睇佢演出,曾經一次囝囝指出佢演出上嘅錯誤:「我讚阿仔真係有料到,佢竟然知道嗲哋邊度瀨咗嘢,佢對音樂好敏感,希望有機會同佢一齊表演。」