【本報訊】「𠵱家唔做，以後就會遲，甚至連個簽名都懶，咁真係只可以成為最後一次（反抗）」。陳琬琳（Bessie，圖）是社運常客，曾多年參與「六四報哀音」，最遺憾是赴台升學缺席雨傘運動，傘運成為一代人傷痛，有份聯合在台港生支援的Bessie感受同一種無力，近年有意無意逃避社會大事。直至港人被迫「硬食」送中惡法，她有感必須振作，跟中學校友發起反惡法聯署；曾冷待時事的她決定再上街頭。

傘運後逃避社會大事

2014年9月是Bessie赴台升學第一個月，香港爆發傘運，「嗰幾日完全冇瞓過覺，想即刻訂機票返香港」，遺憾是未能戰勝家人反對與老師勸告。她指台灣的老師很關注傘運發展，但幾位老師勸她勿衝動回港，「我當時好嬲，諗法係『我自己地方嘅事，點解你哋要出聲？』」但靜下來深思，她明白老師出於好意，「我哋頭半年類似要坐移民監，因為要申請居留證」。

傘運81天後落幕，金鐘、旺角、銅鑼灣清場拘捕數百人，當中不乏Bessie好友。留學四年，她在每年寒暑假返港，每次只感覺城市更壓迫，「做咗咁多嘢，最終只可以妥協，激進少少啲朋友面臨秋後算賬，有種感覺係想休息，想關注好自己身邊嘅事先」，香港新聞仍天天看，感覺卻漸行漸遠，她承認「係逃避」。

去年夏天，她完成設計學位，親友得悉她回港，「每一個朋友都同我講點解要返嚟，長輩問你返嚟做乜？」但她慶幸終回到「自己地方」，「講唔到母語係好抑鬱」，能盡情跟朋友見面聊天，令她無比開心，「係一種家嘅感覺」。

送中條例殺到埋身，Bessie跟母校保良局李城璧中學校友發起聯署，至今逾600人簽名，「我想做返少少嘢，同佢哋（政府）講我哋仲係好緊張呢個地方」。

Bessie笑言在facebook、Instagram連環「鬧爆」建制派硬推修例時，很多朋友跟她說：「以前嘅Bessie返嚟啦。」
■記者周 婷