今年4月成為人母嘅楊愛瑾(Miki)(新聞連結： http://bit.ly/2s4KVA1 )夜晚出席首飾活動時，就以性感黑色開胸吊帶短裙出現。Miki指今次係生完之後第一次出席活動，心情有啲緊張。囝囝就嚟3個月，問佢會唔會搞百日宴，Miki就話：「未必會搞，想低調慶祝，佢o依家乜都唔知，留番一歲先再搞啦。」

現場所見，生完嘅Miki已經回復苗條，但佢就話仲有修身空間，最希望可以再減5磅。不過由於餵人奶關係，所以只會做運動而唔會節食。

之前有報道指Miki因為爆Kary小產，搞到姊妹決裂，Cookies嘅姊妹聚會更係有你冇我。(新聞連結： http://bit.ly/2pRh7VyMiki )Miki今晚回應時就堅稱自己冇爆過料。佢話：「我有睇報道，我梗係唔會咁做啦，識我嘅朋友都知我點對朋友，好多人都肯同我講秘密，因為我聽完就會唔記得，我亦唔八卦，唔會特別問，怕人誤會，朋友講就自然講。」

Miki一再強調自己珍惜Cookies姊妹嘅感情：「我當然對朋友係用心去對，大家識咗咁多年，由17歲識到佢(Kary)o依家已經15年啦，之前大家都單純，而我永遠當佢係朋友，係自己心目中好重要嘅一個人，亦唔想段友誼冇咗，其實人哋講嘅嘢亦唔可以盡信嘅。」

問到有冇同Kary傾番呢件事，Miki就話：「有傾過呢件事，但details係點就唔想擺上枱講，都過去咗。」講到最近幾次活動都一係見佢一係見Kary，Miki就避重就輕答：「咁啱啫，我忙湊BB，佢都要忙出碟去旅行，我哋都有聯絡，都想約出嚟見面。」