【李華華搶先睇】Fitboxx未上市先盈警大埔Lulu幫倒忙?

蘋果日報 2016/04/21 06:00

新股盈警創業板大埔lulu李華華華華Fitboxx偉博

新股概念越來越有趣,保濟丸(雅各臣科研製藥)上市,連賣運動器材嘅Fitboxx都上市,仲肯定係一隻誠實嘅股份。事關佢母公司偉博控股,未上市就已經先發盈警,喺招股書中向投資者預告,今年可能會因為上市所需的一次性開支,而導致純利大跌。認真唔話得。

偉博2007年喺元朗開第一間Fitboxx零售店,之後繼續擴展到依家有7間「Fitboxx元氣館」。原本賣開踏步機、摺合式跑步機、瑜伽用品、脂肪磅等等。2010年開始做埋美容儀器、激光活髮器。公司一般係向品牌或專利擁有人買產品,再轉手賣畀客戶既。

偉博喺招股書風險披露一欄中,都戴番個頭盔,披露佔公司22.3%採購額嘅兩大供應商,生產基地設於以色列,當地政局不穩會影響業務。除此之外,連2014年底發生嘅佔領行動都畀公司攞出翻炒,話如果再有類似情況出現嘅話,又會影響生意喎。

咁坦白,唔怕冇人認購咩?唔好意思,偉博好似最近隻翠如BB股咁,上創業板嘅,可以揀唔受散客玩,盈警又乜好怕喎!

不過都提一提勇於向高難度挑戰、鍾意跟風炒創業板新股的朋友一句,Fitboxx有部iRunner部屋跑步機,係由名不虛傳嘅「燈神」大埔Lulu代言既。唔知偉博上市,會唔會冧莊搵返大埔Lulu敲鑼呢?華華總結吓Lulu戰績,畀大家參考吓(見表)。

掌握財經生活資訊,即Like「蘋果ATM」fb專頁啦!
http://fb.com/appledailyatm