真‧足球小將柴崎岳，西甲夢未圓定係未完？呢位25歲中場今年初加盟特內里費後，上陣12場射入2球，協助球隊打入西乙升班附加賽決賽，可惜上周兩回合以2:3不敵基達菲飲恨，新季去向備受關注。不過，據日本同西班牙傳媒報道，多達4支西甲球隊向佢招手，包括切爾達、貝迪斯、馬拉加同艾拉維斯，一旦交易成事，隨時好似《足球小將》主角戴志偉咁，由全國大賽勇闖西甲賽場！

不過，據報柴崎岳當初俾拉斯彭馬斯放棄後感激特內里費願意給予機會，並協助佢度過水土不服等難關，唔排除繼續留隊；特內里費主席同教練周二亦不約而同表示，正努力挽留柴崎岳，並已經同經理人展開談判，希望佢來季同球隊再次衝擊升班資格。