關菊英今午到荃灣楊屋道街市義賣獎券，為仁濟醫院籌款，甫入街市菊姐受到街坊同檔販歡迎，其中一間商戶見到菊姐好捧場，大手筆捐出二千元做善事。之前菊姐為大台節目賣力演出，傷及筋骨，現在已逐漸康復，幸冇影響工作。

菊姐今日大方接受有線電視訪問，原來佢同無綫喺七月時，已正式結束八年賓主關係，佢為咗自由，放棄同無綫續約。

咁啱陳國邦噚日亦灰心離巢，並於網上向無綫遞辭職信，唔知菊姐係咪有同感呢？菊姐話：「唔係，唔簽理由係想做自由鍾意做嘅嘢，自由身狀態最啱我。況且去簽咗八年，唔係好多嘢做，自由會揀同推工作。」

菊姐直認今時今日舊公司台前幕後面目全非，影響士氣，菊姐話：「事實太多人走，做嘢搵班底冇晒，暫時又冇咩啱對手，以前台前幕後都係我熟悉，0依家調番，我好似新人咁要適應。」以上形容，正正導出大台硬捧新人上位局面。