日本新一代歌姬中島美嘉，平日多數都以cool到爆嘅型女打扮示人，不過，早前美嘉幫日本時裝雜誌《PS》影相嗰陣，就分別着咗三套傳統和服出現，為fans帶嚟耳目一新嘅感覺。

反傳統形象
美嘉為咗宣傳啱啱推出嘅新細碟《LEGEND》，最近着上多套華麗嘅和服，為最新一期日本時裝雜誌《PS》擔任封面女郎，重同讀者分享着和服嘅心得。
日本傳統和服通常都畀人高貴大方嘅印象，但向來打扮前衞嘅中島美嘉，即使着起和服上嚟亦特別有型。身穿一套紅白色和服嘅美嘉，將長髮三七分界，盤喺頭上，最特別嘅地方係佢喺頭髮同衫領上面，加咗隻有型嘅黑蜘蛛裝飾，認真搶眼，再加上美嘉一對smokyeyes，令呢個和服look營造出與別不同嘅邪氣。