做商人，就係咁，當消費者需要改變時，或者有難題需要解決，佢哋就會出錢搵人幫手、解決。商人就憑佢哋對錢嘅愛，攞出資本、心機、血汗，試圖提供解決消費者難題嘅方法。
新產品面世之後，如果成功幫到消費者，就皆大歡喜。消費者開心出錢時，商人嘅勇氣同心機亦有回報。不過如果新產品面世之後，銷情慘淡，商人就會第一時間作出調動，要改嘅就改，要停嘅就停。佢哋反應咁快，全因佢哋攞出嘅資本，係真金白銀，有自己嘅血、自己嘅汗。

所以當有商人大聲話：「嘩！我哋有新產品面世呀！」我就會感覺到佢心裏面貪婪同緊張嘅交戰。就係有咁嘅思維，噚日我睇完財政司司長曾俊華撰寫嘅文章之後，諗起我張報稅表，又要搖頭慨嘆。佢老人家又走出嚟話：「我哋要搞商品期貨。」其實我最驚就係搞咗唔成功，又要搵納稅人祭旗，所以我打電話畀利世民。
世民兄話︰「鬍鬚曾夠話要搞伊斯蘭金融啦！得個搞字！大家咪咁認真啦。香港商品期貨如果真係有得搞，港交所主席兼馬會前主席夏佳理又點會諗唔到?六寶半全場都有得你賭！商品期貨咁大路佢會諗唔到？不過話時話，港交所同馬會都係獨市壟斷，人家真係唔鍾意搞，你又吹得脹咩？慳番啖氣啦，今時今日做官，冇錯係要好似有啲諗頭，不過時不時講咗件事又無咗影，好肉酸，會俾人睇唔起。人家唐英年，雖然乜嘢政績都冇，不過都算做減下紅酒稅，衰衰哋都叫做到。此消彼長，鬍鬚曾唔使旨意做下屆特首。」
講真，政府只要集中精力，推高印花稅稅收。最好嘅方法，不是主動要政府帶頭搞嘢。只需開放交易所市場，就會有以上佢要搞嘅嘢。千祈不要低估香港商人對錢嘅愛。

網誌： http://phatdat.blogspot.com