平時政治團體發起遊行，記者負責採訪，但噚日由記協發起嘅捍衞新聞自由9.13黑衣大遊行，就出現角色大挪移。被內地當局又打又屈嘅記者成為主角，唔少嚟聲援嘅政壇明星級人馬反而變成大配角，但佢哋為咗新聞自由，都唔介意做茄喱啡，好多人仲邊行邊幫記者影相㖭。
支聯會主席華叔過往經常由西區警署遊行去中聯辦，但通常都係做遊行揸fit人，極少好似噚日咁，只係做一個參加者。華叔堅持要現身撐記者，無非因為佢見盡內地對付異見人士陰招，希望港記唔會好似異見人士咁有同一遭遇。

以武力專政治國

前全國人大常委曾憲梓話十．一前夕應該淡化事件，華叔自然唔同意，仲叫特區政府唔好玩「拖字訣」，以為拖拖吓就冇咗件事。華叔仲話，好多人以「輝煌」呢兩個字嚟形容中共建政60年，但如果拆開呢兩個字嚟睇，就發現兩把火隔籬，分別係「軍」字同「皇」字，即係武力同專政，足以反映呢60年嚟，中共仍然係以暴力同專政治國，有乜嘢咁值得慶祝？
華叔忽然變身測字專家，好多人聽完都點頭稱是。其他政界人士唔識測字，惟有用行動以示對記者嘅支持。公民黨好捧場，黨魁余若薇、副主席梁家傑、秘書長陳家洛，同埋湯家驊都有現身；梁家傑仲要搭晚機去東歐考察，算係唔話得。

記者遊行唔在行

民主黨主席何俊仁同民協馮檢基都一早到場聲援。職工盟李卓人亦與徒弟仔譚駿賢攞住標語撐記者，而且擘大喉嚨嗌足全場，就算唔係自己搞嘅行動都絕不欺場。平時做開採訪工作嘅記者搞遊行，自然有唔少甩漏，搞到企喺側邊嘅李卓人都笑笑口，話記者好明顯唔係專業示威者囉。
過往政黨喺西區警署出發遊行去對面嘅中聯辦，通常都係十零廿個人，估唔到香港記者協會第一次號召同業就逼爆西環，不少政界中人都大讚記者好嘢。八方所見，遊行隊伍當中雖以前線記者居多，但亦有傳媒高層現身，有位仲特登買咗件黑色新恤衫，着住上街㖭。

mailto:[email protected]