美國樂壇小天后Taylor Swift，又有新男友，仲要係中國人？話說中金公司財富管理部前執行總經理，互聯網金融公司米牛網聯合創始人吳小平，噚日發咗個微博，全文係咁：

美國排名第一的流行歌星，正在與一位中國中年科技富豪交往中。如果幾個月後傳出婚訊，世界要大亂了，有關股票是不是要大炒一把……

正所謂，微博一出，駟馬難追，網民網媒瘋狂估男女主角係邊個！首先，講女主角，首先，一定係女人！第二，「排名第一」，Katy Perry？Lady Gaga？Beyonce？睬！大咗肚等生…仲有一個，最近又散咗，未傳新男友嘅…Taylor Swift！

鎖定女主角後，就一定要搵男主角，「中年科技富豪」嘅單身王老五係邊個？網上都有唔同講法，仲有全方位分析！

小米雷軍？No，佢英文真係好「雷人」，溝通唔到…
鎚子科技創始人羅永浩？佢自己否認咗：「別鬧，我喜歡女的……我就算一時糊塗，也絕不可能是Pop這個Genre。」
樂視賈躍亭？佢溝掂投資者科水先啦，仲講溝女…
劉強東？人哋有「奶茶妹妹」啦
馬雲、李彥宏都結晒婚，退晒市

勁網上神探推算，數來數去，搜狐董事局主席兼CEO張朝陽，就成為最大嫌疑人！

不過，張朝陽接受Bianews訪問時表示，「It's a rumor! No taste for foreign women. 甚至連霉霉（Taylor Swift在內地的花名）是誰都沒聽過。」

張朝陽否認之後，到依家男女主角係邊個，都冇人有答案。詭異嘅係，始作俑者吳小平微博個Post delete咗，然後今朝又出多個Post，寫「張朝陽何必闢謠​​​​」。

真真假假冇人知，但幾肯定嘅係，就算Taylor Swift真係同中國科技富豪拍拖，維持嘅時間九成機會都係以「月」計。

話說，有「男神收割機」之稱嘅Taylor Swift，對上個男朋友係英國男神「洛基」Tom Hiddleston，但戀情只維繫到三個月，於上年9月份便分手

掌握財經生活資訊，即Like「蘋果ATM」fb專頁啦！
http://fb.com/appledailyatm