近日一班韓國工人專程來港，為籌備緊上市嘅韓資公司衣念「贈興」，喺中環上演一幕又跪又拜悲情劇。咁大陣仗，原因係衣念母公司衣戀為咗逃避韓國勞動合同法，舊年炒咗大批工人。原來喺內地華東華北一帶，亦有部份韓資公司因為經營環境逆轉，突然走佬消失，留低一批冇糧出嘅工人唔知點算。

一蚊雞都唔會拖欠

噚日香港工業總會舉行每年一度嘅「香港青年工業家獎」同「傑出工業家獎」開展儀式，會後工總主席陳鎮仁被問到內地港資企業有冇執笠，佢話工總旗下嘅會員就冇，但部份會員一啲細間嘅供應商就出現倒閉情況。佢仲話香港嘅廠家即使結業，相信都會做個盡責任嘅僱主，做到「光榮結業」，對於工人嘅工資、供應商嘅貨款、政府嘅費用稅項，都會依法清還繳納，「唔會欠任何人一蚊雞！」
佢又預期，今年下半年廠家嘅經營環境會更加困難，事關加工貿易嘅「台賬實轉寬限期」8月就屆滿，到時廠商嘅資金周轉會更加緊張；而奧運熱潮過後，估計定單亦會減少。