「山神」阿歷斯山齊士同阿仙奴續傾一直傾唔埋欄，好多人都覺得係錢作怪，因為呢名智利前鋒獅子開大口，就算兵工廠加到30萬鎊（約300萬港元）周薪畀佢，佢都不為所動。不過，最近有消息傳出，山神為咗加盟曼城，竟然願意減薪！據英國《獨立報》報道，由於28歲嘅山神覺得自己年紀唔細，要喺球壇有所成就嘅話就要趁依家，所以好想加盟藍月亮，同藍月嘅領隊哥迪奧拿故劍重逢，仲話就算曼城嘅周薪係少於30萬鎊，佢都唔介意。