好多人都仲放緊假未返，所以港股成交好少，上周五只得380幾億元成交，但個市場氣氛唔錯，尤其啲手遊股，上周五好多隻都爆咗上去，例如神州數字（8255）、IGG（8002）等破頂而上。老實講，勝曉嵐都係一個手機遊戲迷，近一年都係迷上打CandyCrush，差唔多日日都問啲老友畀條命嚟，又或者攞飛過關！呢啲手機遊戲嘅魔力有時真係好難去解釋，玩開真係停唔到手，尤其打極都過唔到關嗰吓，就更加想打落去，所以某程度可以解釋到手遊股可以有咁勁嘅爆發力。

仲有喎！依家好多遊戲嘅壽命唔短，就再舉CandyCrush為例，佢不斷有新update，而且每次出嘅新關都可以畀你有驚喜，所以再推論落去，好多手遊股其實真係可以有排炒。雖然在下只玩CandyCrush，不過身邊梗有幾個宅男宅女，經常不休不眠打機，其中一位宅男朋友，佢早輪就成日沉迷打「手機三國（蘋果版已更名為指戰三國）」，聽講，佢為咗過關，經常喺網上畀錢買武器，仲要話係使咗佢唔少錢，可見瘋狂程度難以估計，而既然手遊股已經成勢，估計應該會有好多公司會抽水都話搞番一份。

事實上，除咗幾隻主流手遊股如網龍（777）、IGG、博雅（434）、雲遊（484）外，近期的而且確多咗好多唔關事嘅公司都話搞手遊，好似本業做電池嘅光宇（1043）、做耳筒嘅先思行（595）、做電影嘅寰宇（1046）等，都話自己有一隻半隻game搞緊，跟住炒餐飽。有啲仲搞笑，未有game喺手嘅都炒，好似隻萬德資源（8163），早前就配股集資2913萬元，話攞嚟用作擴展貿易業務同資訊科技業務，包括但不限於物色機會投資及開發網上遊戲、移動遊戲同金融服務相關軟件，就係咁，隻股近日由一毫九仙幾炒到上嚟兩毫幾。

健唔健康？真係唔敢答你，想當年邊有人諗過隻騰訊（700）可以由幾蚊炒到上嚟幾舊水，所以在下唔敢否定所有可能性，但都係嗰句，投資涉及風險，自己量力而為啦！