今集《跟詹Sir學驗樓》去到新地（016）將軍澳日出康城晉海驗收一個實用464方呎兩房單位。經資深驗樓師詹濟南（詹Sir）審批下，小記略有所成，搵出全屋最重要、拖累單位無10分的洗手盆漏水問題。瑕疵以外，幾項設計引來詹Sir及業主的批評，其中開放式廚房摺枱驚現「831」數值 ，業主鄭小姐為之氣憤，非但不滿夾死人，更嫌篤眼篤鼻，又覺睡房相連工作平台「唔知為乜」。最終詹Sir評單位88分，業主不滿意，「佢哋特別以樓盤質素聞名，所以先至唔介意畀一個貴啲價錢買呢度。」她不諱言有點後悔，覺得寧願選擇較近港鐵康城站的新盤。

業主鄭小姐2017年斥資約655萬元買入將軍澳日出康城晉海一個兩房單位，實用面積464方呎，呎價約1.4萬元，「住過長實樓，空間無咁寬敞，有啲位呃秤，做唔到傢俬。聽阿爸阿媽講，呢間發展商好，本身對佢都有信心，而且睇到（晉海）單位四四正正，主人房擺到雙人床和衣櫃。」

收樓後，「先講開心嘢，景觀超乎預期，諗住對領都，點知望山又望海。不過開放式廚房已佔個廳一半空間，擺唔到飯枱。苦惱咗兩年，單位點擺飯枱？每次諗到（唔知）飯枱點擺，就唔係好想搬入嚟。嚟到單位見到廚櫃拉出來嗰張唔知係side table定high table，就更加苦惱。」她又關注單位有無漏水問題，甚至親自測試主人房工作平台門邊是否漏風，因為詹Sir教過「漏得風就漏得水」，「閂晒全屋門，露台邊工作平台門感到有風，咁嗰度我會將來整榻榻米，如果日後有少少雨水滲入嚟，比廳滲水仲大鑊，因為打算做木傢俬，入咗水會搞到發霉，甚至漚蟲，到時會叫苦連天。」她又認為：「工作平台都唔知為乜，對買家來講，可以唔需要，呢度計緊實用面積。」

小記經過上次詹Sir在大埔海日灣親授後，今勻來到晉海就略為識做。檢查洗手盆來去水，除了儲水放水留意水喉管及隔氣等裝備有無漏水，還要留意盆邊玻璃穩不穩固。放水後，喉管無漏水，但櫃底卻出現一灘水，仔細檢查，發現盆邊與枱面石之間無瀄膠，輕輕潑向邊位，就見漏水落櫃底。客廳地面鋪設木紋磚刮腳，部份磚與磚之間高低「起級」，高低差可頂住一張八達通。令業主嫌棄的廚房活動式桌子面板已撞花，廚櫃櫃門亦刮邊。全屋玻璃崩花就沒發現，僅有少許污迹，一捽就甩。

詹Sir到埗，小記就展示開放式廚房活動式摺枱板撞到崩花，他解說：「知唔知問題喺邊度？你推吓枱，慢慢推，係咪推過地磚罅就撠住？因為地磚夾口罅有高低，目前允許高低偏差1毫米，呢1毫米足以造成震動。我諗設計嗰陣無諗到地面用木紋磚，呢啲咁嘅設計唔好，每次推枱都會撞擊，咁樣唔襟，我相信1至2年就玩完。」詹Sir又抽水：「呢張枱拉出拉入有少少唔順，發生咩事呢？度一度先，一邊闊836厘米，另一邊闊831厘米，8.31夾人死喎，啱啱有少少『啤把』（一邊闊一邊窄）。」

小記向他匯報客廳地面木紋磚刮腳，詹Sir覆檢，兩塊瓷磚之間的高低差是1毫米，屬於及格，如果少於1毫米，一般泥水師傅不會理會這個瑕疵。普遍瓷磚廠生產瓷磚，每塊都有零點幾毫米的差距，所以難以避免這個問題。不過如果位處客廳正中間的位置出現刮腳，業主可以考慮要求發展商執修，但如果屬於床下底或梳化底，就不值修理。

客廁洗手盆邊漏水，詹Sir施以鋼片審核，「係走咗雞啦，成塊鋼片攝晒入去，通晒窿，實漏啦。多數裝完盆會瀄口膠，有人就裝暗膠。但而家肯定唔係暗膠，係乜膠都無。」他續稱，只是盆邊漏水，去水喉無漏，浴室亦無空心磚。至於單位玻璃窗，經過他和徒弟康仔再三檢驗亦沒有崩花，客廳地磚有一處少許空心，但不足全塊磚十分一，未算超標。詹Sir總結，一條膠累單位扣10分，加上鋪磚、廚櫃及油漆扣些微分數，單位驗樓得分88分。

業主鄭小姐聽完得分，認為廁所漏水問題應可解決，不過最失望廚房摺枱，「我要自己搵人變返道門，呢個設計真係唔user-friendly，食飯又唔係，做side table成日開個底會淆，亦唔會長時間拉出來用。寧願佢張枱高返少少，可以畀人坐喺度食飯。」她無奈稱：「佢哋（新地）特別以質素聞名，所以我先至唔介意畀一個貴啲價錢買呢度。以地理位置嚟講，由康城站行過來要10分鐘。如果唔係貪質素好，更加唔會買呢度。如果係咁樣，我寧願買近少少康城地鐵站嘅樓盤。（有少少後悔？）係呀。」

新地發言人回應，已即時跟進所提出的項目，除了一項更換工作預計於本周日（12月15日）完成外，其他執修工作經已完成，稍後將通知業主驗收。

記者：陳家雄、張嘉鎣

影片：
編撰、旁白：張嘉鎣
攝影：細釗
剪接、後期：東尼
編審：楊智佳