電子傳媒冷待五區補選，怕被指幫公投造勢，冇乜興趣搞選舉論壇，浸會大學國事學會噚日率先舉辦第一場選舉論壇，新界東四名候選人中，除中大生周澄外其餘三人都有現身，長毛以一敵二，橫掃兩件蛋散。
承認自己零知名度嘅胡世全，噚日細訴參選心路歷程，話自己出身低微，細時穿膠花，大時被人蝦，試過三餐不繼豉油撈飯，曾經想輕生，感謝神帶佢認識基督，之後改名Tiger重過新生；活到半百，覺得係時間回饋社會，一於參選。
另一候選人陳國強針對社民連掟蕉，話要譴責暴力行為，但原來佢仲暴力。自稱89年六四時，曾有一名富貴舊同學，指示佢組織暗殺隊喺香港進行政治暗殺，佢講到繪影繪聲，聲言有份暗殺名單，「因為我係跆拳道黑帶，可以代表香港打亞洲賽。」

跆拳道都唔止，陳國強稱當年籌到筆錢整炸彈，筆錢後來交畀陶君行拎上北京支持民運。喺網上留言炸迪迪尼都犯法，家陣有人公然話有暗殺名單仲要整炸彈，八方強烈要求警方跟進。長毛反駁陳國強，指六四時帶錢上北京係李卓人，陳國強亂噏，「你連資料都搞唔清楚，呢啲係語言暴力。」
長毛又要求陳國強交代所謂暗殺名單，若然真係有人想喺香港搞政治暗殺都幾得人驚，陳國強死撐，「我今晚問佢願唔願意開名。」長毛窒佢吹水唔抹嘴，「你今晚至問人可唔可以開名，家又振振有詞，你唔好話胡錦濤搵你！」
政協劉迺強日前狂鬧公投同普選聯，長毛噚日同佢算賬，「佢點做到政協？擦共產黨鞋囉，講最核突嘅說話，鬧香港人，劉迺強，我係未見過呢種咁賤格嘅人渣，我真係未見過！」
選舉事務處噚日指陳乙東同杜森未獲有效提名，即係今次補選少兩個奇人。

mailto:[email protected]