F1平治車手咸姆頓今季喺車手榜暫以263分排榜首，領先法拉利車手維特爾28分，有望第四次贏得世界冠軍，不過現年32歲嘅「黑帝」近日受訪時，就大爆自己曾諗過退役！眾所周知，黑帝近年熱愛音樂，仲不時會去錄音室造歌，而近排佢同巴西球星尼馬、匈牙利模特兒Barbara Palvin等人現身倫敦時裝周，似乎都有興趣投身時裝界㖭。

黑帝近日接受電視節目《The Jonathan Ross Show》訪問時，就直認自己有諗過退役，而且最近五、六年開始發掘賽車以外嘅興趣。不過車迷請放心，因為今季同維特爾鬥得難分難解，令黑帝打消退休念頭：「我確實已經考慮過（有關退役嘅事）。我認為自己有好多嘢想做；但另一方面，我哋正處於戰鬥嘅最精采階段，我宜家亦比以往任何時候都更熱愛賽車。」