牛年都過咗近半，理工大學卻繼續旺鼠。八方收到風，位於校內核心位置、校長辦公室所在嘅理大李嘉誠樓竟然鬧鼠患，鼠輩橫行肆無忌憚，公然喺辦公室出沒，唔少教授、高級職員嚇到半死，無日安寧。
李超人當年捐出一億元畀理大，理大將新大樓命名為李嘉誠樓答謝，呢幢大樓高18層、面積共約15,600平方米，係校內最豪最矚目建築物，頂層係校長辦公室，高層雲集，可以話係理大最高管理層重地。理大中人同八方講，一幢咁新型大樓竟然有老鼠出沒，真係匪夷所思，不過事實擺在眼前，唔到你唔信。

高層開會老鼠橫行

鼠輩猖獗，據講最離譜一次係有高層開會時，會議室內竟然有老鼠走過，嚇到所有人呆晒，忍得住唔尖叫或者跳上枱真係十分冷靜兼克制。事後高層下令全力滅鼠，在大樓多處放老鼠籠、老鼠夾，但係唔知方法不對抑或大學內嘅老鼠都聰明過人，至今尚未捉到一隻完整老鼠，最好成績只係有個老鼠夾夾到一條鼠尾，尾巴嘅主人則逃之夭夭。
點解鼠患咁嚴重呢？原因言人人殊，有人指李嘉誠樓14樓有間酒樓聚賢樓，估計老鼠因此而來。不過餐廳請專家視察後，卻指佢哋都係苦主，因為只發現14樓有老鼠屎同鼠蹤，並無鼠竇。另一教授爆料，理大以前有部門專養老鼠供學術研究，唔排除有老鼠逃走後開枝散葉，而且大學好食好住肥缺多，逃出生天嘅老鼠唔捨得理大，留低頤養天年不足為奇。

捉走花貓自食其果

亦有人指理大鬧鼠患係自食其果，上任校長潘宗光難辭其咎，追隨佢多年嘅管理層也不能置身事外，事關理大校園本來有一隻黃色花貓，校方卻容不下，將佢生擒交畀漁護署，貓都冇一隻，又唔似城大咁有個「鼠王芬」坐鎮，老鼠仲唔作反咩！
新校長唐偉章上場不久，鼠患算賬隨時扯到前校長頭上，八方估計，呢場打老鼠風波唔會輕易平息，引鼠出洞可能只係序幕，日後權力鬥爭好戲相信陸續上演，名為剿滅老鼠，實為鏟除異己，《詩經》有云：「碩鼠碩鼠，無食我黍。」理大各級教職員，好自為之。
mailto:[email protected]