韓國女團少女時代成員允兒早前孖韓劇《未生》男星任時完、韓版《步步驚心》男星洪宗玄主演嘅MBC新劇《戀愛中的王》，終於喺15日煞科，繼允兒日前於Instagram上載跟劇組嘅大合照後，劇組今日亦公開三人最後一次拍攝時嘅合照。

新劇講述世子王謜（任時完飾）及高麗王族王麟（洪宗玄飾），為爭殷珊（允兒僑）而兄弟情不再，允兒就表示：「6個月嘅時間內跟好多非常好嘅人一齊工作，真係非常感謝。殷珊呢個角色對我嚟講係一個新挑戰，為咗兩名男主角而忐忑不安，希望今年夏天大家可以跟殷珊一齊感到心動。」

任時完就表示：「每日都跟劇組一齊進行拍攝，結束後感到有啲遺憾，因為非常努力地拍攝，所以希望觀眾可以愉快地欣賞。」洪宗玄亦表示拍攝咗半年，跟角色一齊喊同笑，每次感覺到辛苦時，因為有劇組陪伴先可以順利捱過，拍攝結束後感到遺憾，不過都好期待新劇播出，而《戀愛中的王》將於下月17日首播。