阿根廷喺2018世界盃南美洲區外圍賽苦苦掙扎，上月初決定辭退教練鮑沙後一直未請到人，雖然眾所皆知西維爾教練森柏奧利係佢哋獵物，而呢位57歲主帥喺周五記招亦開聲表示願意「精忠報國」：「我嘅國家希望我執起國家隊教鞭，呢個係我嘅童年夢想。我唔會為咗轉投另一歐洲球會而離開西維爾，但為咗國家隊我在所不辭。」其實目前距離森柏奧利同國家隊帥位只有一個障礙，就係西維爾合約上一筆150萬歐元（約1,170萬港元）嘅買斷費，但阿根廷足總出名窮到燶又「度縮」，試過拖保安糧，又逼國腳搭廉航踢作客比賽，唔知阿根廷球員們有冇打算「捱義氣」，幫手夾錢請人呢？

咁啱阿根廷喺周五公佈下月友賽巴西同新加坡嘅外流球員名單，除咗美斯、希古恩、保羅戴巴拿等主力入選，亦有韋斯咸中場蘭仙尼、阿特蘭大前鋒艾真度高美斯等新鮮面孔，國際米蘭射手莫路伊卡迪亦獲得重召，雖然阿根廷足總表示呢份名單係辭退鮑沙後由足總訂出，但唔知森柏奧利有冇份過目呢？