【Cut機都照扒】病倒照樣頂硬上 鎮宇扒龍舟扒上癮

蘋果日報 2018/06/18 16:34

吳鎮宇端午節扒龍舟逆流大叔
    今日係端午節，好多人都會食吓糉、扒龍舟（或者睇人扒）嚟應節，而即將喺8月2日於香港上映嘅新片《逆流大叔》，以龍舟為主題嘅電影，當時唔少得扒龍舟嘅戲份，而主角之一嘅吳鎮宇仲扒龍舟扒上癮！
    《逆流大叔》喺去年7至9月期間拍攝，當時正值炎夏，烈日當空，的確啱晒劇組想要有嘅好天氣，不過就辛苦咗一班演員，佢哋唔單只喺電影開拍嘅頭3星期要喺戶外拍攝，而到「戲肉」嘅扒龍舟戲，鎮宇等主要演員喺零經驗嘅狀態下，只得半日時間去學習，鎮宇話：「其實我哋只係上咗半堂去學扒龍舟，其餘時間就係邊拍攝邊學，每個動作都有正式龍舟教練喺攝影機旁邊睇下啲動作啱唔啱，不過我覺得大家都算學得好快，仲越學越好玩咁，最尾一場我哋直頭係扒上癮，喺導演cut咗機後都一路繼續扒，扒到個個都冇力先停低。」又由於拍攝期間時晴時雨，令不少演員病倒，鎮宇喺拍攝期間更一度帶病上陣。
    連潘燦良都話扒龍舟睇落容易，但其實成team人一齊扒就好唔簡單，佢話：「自己一定要配合大家去感受彼此間嘅節奏同力度，大家就會一齊向前飛。」而本身係運動員胡子彤就話今次嘅體能需求好大：「拍攝一整日真係會扒到幾攰，可以幫我保持運動員狀態同心態。」至於黃德斌就話每日都要好早起身，一到場就要進入狀態：「當處於嗰個環境同氣氛，大家都很開心的時候就唔會覺得太辛苦。」
    除咗一班「大叔」辛苦之後，連化妝部門都好辛勞，除咗不停要為演員補妝等，佢哋今次更用咗100支防曬太陽油，創下紀錄。
    精選娛聞，喺晒《娛果》
    http://fb.com/appledailyent
    empty
    電影於去年7至9月，最炎熱嘅季節時拍攝。
    empty
    胡子彤係運動員出身，都話體力消耗大。
    empty
    鎮宇一度抱病上陣
    empty
    潘燦良話要全團隊人互相配合節奏同力度先可以一齊向前飛。
    empty
    胡子彤坦言拍攝一整日真係會扒到幾攰。
    empty
    黃德斌話每日好早就要起身到場，一嚟就要進入狀態。
    empty
    大部分演員都未接觸過龍舟，邊拍邊學。