利物浦禮拜六喺英超尾場主場迎戰車路士，係呢個禮拜嘅重頭戲。利記翼鋒穆罕默德沙拿今季表現唔錯，有記性嘅球迷亦應該會醒起，沙拿之前都踢過車仔。其實，喺呢位埃及球星上「車」前，沙拿幾乎已經傾掂數由巴素利轉投紅軍，但係利物浦喺2014年1月等緊嘅一個電話始終無打到嚟，紅軍反而收到巴素利嘅一封電郵。

英國《電訊報》報道咗一個都幾陰謀論嘅講法，指利記本來已經睇咗沙拿半年，諗住簽到佢就可以幫手喺2013/14球季爭冠軍。利物浦等唔到嚟自巴素利嘅電話，但係收到呢間瑞士球會嘅電郵，「沙拿決定轉會車路士」，內文無解釋原因，沙拿嘅經理人之後亦唔再聽利物浦嘅電話。

個故仔梗係未完，沙拿U-Turn係因為收到當時仲帶緊車仔嘅摩連奴打俾佢，但車仔介入呢場爭奪戰，純粹係以本傷人，無論利物浦出幾多錢都好，佢哋都會加碼，為嘅就係搞亂檔，等利物浦簽唔到想要嘅球員，喺爭標路上打擊紅軍。有報道話，沙拿上「車」後無耐就換咗經理人，但係原因不明。

呢個勁陰謀論嘅講法嚟到呢度就完嘞，順帶一提，車路士果季贏唔到聯賽冠軍，利物浦當然都無份，個獎盃最後係落喺曼城手上㗎。

--------------------
最後機會！『BFB X HKTV Mall』4周年限定福袋幫你入手！今個星期贏埋盃賽，仲送實體禮品包添！澎湃優惠，立即入手： http://bit.ly/2jo9E2N