香港有一個商場叫「金都」，這裏集合了結婚所需，然而以這個商場名命的電影，也屬首次。鄧麗欣（Stephy）主演的新戲《金都》，早前因疫情關係，延期至今個月才上映。戲中她演的阿芳，經歷感情的考驗，才找回自己，走回自己想行的路，像現實的她嗎？Stephy形容自己對愛情曾有點儍，想改變對方，卻徒勞無功。人與感情隨年月成長，Stephy在愛情路上也漸漸學懂︰「我只追求平淡嘅愛情。」

電影《金都》自去年11月參與金馬獎，到今年5月的金像獎，因疫情影響足足擾攘了大半年，直到本月11日才正式上映。Stephy坦言終於等到，「之前睇過優先場嘅人都好多，都好期待其他觀眾對呢部戲嘅反應同睇法。」對金都這個婚禮用品集中地，Stephy笑指拍這部戲才首次踏足這個地方，「好多人都話去金都買結婚嘢同影婚紗相，我比較孤陃寡聞，拍《金都》之前未去過金都，唔清楚係個咩地方，嚟到覺得好得意，如果要結婚，一個商場可以全套服務搞掂晒。」

從前的Stephy，在愛情小品電影中，令人最深印象就是「阿寶」這個角色，儼如阿寶就是Stephy，不可分割，「其實我都冇做阿寶好耐，因為大家太記得喇，我都想拍返青春校園片，只係冇人搵。」近年Stephy嘗試不同類型的角色，如今次在《金都》中的阿芳，她說︰「好多人都話呢個角色同以前我演過嘅角色好唔同，今次個角色係一個好真實嘅人物，好似總有一個阿芳喺左近，係個好生活化嘅角色。其實同一個角色，喺唔同時間去演，都有唔一樣嘅感覺。如果我而家演返阿寶，可能都唔同，因為我嘅經歷畀我有唔同表達。」

戲中講述一對為別人籌劃婚禮的情侶，卻在籌備自己的婚禮時，產生不少矛盾，考驗這段感情能否繼續走下去。現實中，Stephy曾與方力申拍拖十年，可惜未能開花結果，兩人於2016年分手。從前的Stephy對感情抱着「乜都得」的態度，「嗰刻俾愛冲昏咗頭腦，覺得乜都得，但原來係唔得。感情就最明顯，遷就咗對方，當下以為自己OK，但累積落嚟越滾越大，就會發覺原來自己係唔OK。」經歷過愛情挫敗，Stephy學懂隨心而行，她說︰「細個時嘅我，唔介意去遷就人哋，即使有啲嘢唔係自己最鍾意，都OK啦。以前嘅我唔識say no，但而家嘅我就會say no，有問題就要當下解決。」

刻下Stephy與台灣藝人王子（邱勝翊）發展姐弟戀，雖然兩人分隔兩地，但他們不經不覺拍拖兩年了，問她可有一顆恨嫁的心？Stephy笑謂︰「仲細咩！哈哈，真係冇呢啲感覺。」她坦言也沒有憧憬過，「可能我太細個入行，成日都着婚紗拍戲同影相，我平日做騷影相都好靚啦，唔會為咗靚而去結婚，完全冇幻想，亦明白婚姻係乜嘢，所以唔會衝動，亦唔會為一時嘅快樂。」問她還未想嫁？Stephy說︰「又唔係唔想，睇緣份吧。」曾有愛情經歷的她，人也成熟了，對愛情觀和婚姻的看法也不同，她說︰「從來我都係追求平淡嘅愛情，只有電影先至有轟烈嘅愛情。」問她王子是否她將來的結婚對象？她向男友大派定心丸說︰「好似好有條件咁，其實大家係開心，都希望可以長久一齊。」

撰文︰羅婉玲
攝影︰仇志德
攝錄︰廖達燊
髮型︰Vince Pang @ IL COLPO group
化妝︰Cyrus Lee

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新