九西補選倒數一星期，候選人密鑼緊鼓最後谷票，《蘋果》早前邀請5位候選人搵支持者拍攝拉票短片，睇吓邊啲粉絲最有心思？自稱「劏房阿哥」嘅伍廸希獲相識25年嘅朋友用手語為佢拍片助選，令非主流選民都可以認識到佢，認真破格；工運出身嘅李卓人就有港龍工會嘅一眾靚靚空姐空少現身支持。
伍廸希提供嘅宣傳片有畫無聲，但無聲勝有聲噃，佢有兩位朋友喺片中以手語拉票，其中一個話認識伍廸希已經25年，形容伍係一個相信「只要有決心，不斷努力，就能夢想成真」嘅人，至於另一個相識11年嘅朋友就形容伍相信人人平等，佢哋一齊呼籲九西選民支持伍廸希。點解用手語拍片？伍廸希同八方講，兩個都係工作上認識嘅朋友，其中一個係聾啞人士，佢都希望自己參選嘅訊息可以用唔同方法令任何人都知道，所以以手語為題。