中國體育總局拳跆中心周四宣佈，由於日前全運會拳擊比賽出現裁判嘅判決出現巨大爭議，造成不良影響，因此決定解散國家拳擊隊、暫停拳擊部主要負責人職務，終止問題裁判嘅資格。

有消息指8月3日至13日舉行嘅全運會拳擊賽，有部分場次嘅判決引發多宗投訴，有運動員亦就比賽結果提出質疑。據悉最多人指出現黑哨嘅拳賽，係8月13日舉行嘅男子75公斤級決賽，當時湖北選手文銀杭以比數5:0擊敗新疆代表唐提拉汗。不過，據國內傳媒報導，比賽嘅真實戰況係唐提拉汗全場佔優，多次重拳擊中對手，一度將文銀杭打到爆晒缸兼搖搖欲墜，後者幾乎冇還擊之力。

中國體育局喺聲明指出，呢件事反映出拳跆中心喺挑選裁判中存有漏洞，也顯示出拳跆中心喺管理上有問題，並有不可推卸嘅責任。拳跆中心將暫停拳擊部主要負責人職務，以便協助調查，而拳跆中心主要領導會接手主持拳擊部，並就此事展開調查。除此之外，拳跆中心亦會解散現時國家拳擊隊，並會按照新嘅國家隊備戰要求重新進行選拔。