網壇本年度第3個大滿貫溫布頓網賽，正賽下周一就開打，唔同球手有唔同備戰方式，其中梅古露莎、姬維杜娃、施維杜蓮娜、施寶高娃同艾莎倫嘉等就選擇輕鬆啲，周四喺倫敦出席WTA Party開P放鬆吓，其中去年12月生完bb、上星期先喺馬略卡網賽嘅艾莎倫嘉，身材已經「弗」番晒，sharp醒程度可謂冠絕全場！至於梅古露莎嘅窄身褲黑白配搭，就堪稱最型格之選。

你有你開P，亦有網壇女將繼續喺WTA伊斯特本網賽爭個你死我活，其中英國一姐干達喺比賽期間跣腳撻到「攤攤腰」，仍然以6:3、6:4拍走頭號種籽姬芭，晉級4強火併捷克球手比莉絲高娃。至於羅馬尼亞球手哈蕾普嘅一姐夢，隨着8強以7:5、4:6、1:6反負「丹麥甜心」禾絲妮雅琪後暫告粉碎，禾琪4強將會對另一英國球手希花屈臣。