身為恒生銀行（011）獨立非執行董事嘅新世界發展（017）主席鄭裕彤，噚日出席恒生股東周年大會，各大傳媒立即追住佢唔放。彤叔亦興致好，對記者有問必答，暫時取代香港股神李四叔，同大家講吓佢嘅投資心得㖭。
恒地（012）主席李兆基早輪密密增持旗下公司股份，彤叔亦不甘示弱，自爆一路都有增持新世界股份，不過因為未到要披露嘅水平，先冇俾大家知啫。

A股、港股　樓市都平穩

至於股市跌咗一輪，佢有冇撈底呢？彤叔話都有買內地股同少少港股，尤其睇好近期大熱嘅台灣經濟，但因為好耐冇去考察，暫時冇投資當地市場；提到佢仲有研究新股時，又順勢彈吓家陣啲新股話上又唔上，都唔知邊隻最終會上市。總之佢話𠵱家仲有貨喺手，間中會投資「中資上市國企股」啦。
至於內地調低印花稅，佢老人家認為可以穩定人心，未來A股表現平平穩穩，港股都係，唔會大升，不過現水平25000點就未升夠，因為本港經濟好嘛！樓市呢？彤叔話本港勾地困難，施工量同落成量又低，估計未來兩三年新住宅供應都非常有限，樓市走勢亦係幾平穩，全年平均「升十個八個（百分點）」啦！

袍金大增　冇人問即明白

講番股東會，會上其中一道議案，係要通過加董事袍金，董事長由23萬加至36萬銀，非執行董事袍金更由15萬急增至28萬銀，在場小股東立即起哄，有位中年女士大嗌：「嘩，一加就加成13萬銀！」在場股東哭笑不得，雖然小股東似有微言，不過就冇人提問。
恒生董事長錢果豐喺會後話，公司業務越嚟越複雜，考慮到董事同非執董履行責任時付出嘅努力，先至提高袍金至市場水平，既然在場小股東冇反駁，深信佢哋明白喎！
電郵：mailto:[email protected]