當年今日
關於我們

馮仁昭四圍超:袁潔儀蘭桂坊派卡片𢱑撈

蘋果日報 2002/01/21 00:00


亞視嘅袁潔儀雖然分別同鄭維朗、傅湛杰傳過緋聞,但並冇影響佢哋嘅友誼,而且佢哋一直俾公司投閒置散,所以平時會約埋一齊去消遣。前晚袁潔儀、傅湛杰同鄭維朗去咗中環蘭桂坊玩,佢哋除咗向記者大派卡片,重硬銷自己乘機𢱑撈。

兩男有樣學樣
袁潔儀見到記者即時大派私人卡片,佢話:「我雖然同亞視重有九個月合約,但𠵱家冇經理人,專登印啲卡片派畀人,等多啲人可以搵我做嘢。如果啱嘅,有嘢撈記住單聲,到時我再通知亞視一聲。」而傅湛杰同鄭維朗見袁潔儀派卡片,佢哋都有樣學樣。
前晚蘭桂坊有一香煙商喺度搞活動,但由於事前冇申請,所以警方到場了解後,個活動最終都唔能夠如期舉行。而一班本來為活動表演嘅女郎,佢哋着到閃閃令喺街巡遊,重向途人派螢光膠圈,十分受歡迎。

陳雅倫重返娛圈搏殺
陳雅倫呢排出番嚟拍戲,重戴住私伙三卡嘅鑽石戒指同名表,佢同記者講話呢啲飾物都係追求者送嘅,馮仁昭知佢冇講大話,佢的確係幾多人追。陳雅倫早幾年掛住拍拖所以半退出娛樂圈,但雖然多人追始終都未搵到結婚對象,最近佢諗通咗,拍拖唔可以當飯食,所以咪諗住出番嚟娛樂圈搏殺。
羅慧娟不再執著婚姻
馮仁昭一向都知羅慧娟鍾意細路仔,以前嘅娟妹認為自己將來係一定要生小朋友,不過佢近年人大咗加埋經歷多咗,已經唔再執着。
娟妹噚日出席無綫節目嘅宣傳活動時話,如果一開始識男仔嗰陣,就諗住同人結婚生仔,唔止會令到自己壓力大,而且重好易做咗錯誤嘅決定㖭。

盧希萊隨時返亞視
盧希萊生咗囡囡陳佳言之後,成個人積極咗好多。佢最近同老公豹哥忙緊籌備開車行啲嘢,至於佢早排話想返亞視做藝員,馮仁昭收到風話亞視都考慮緊呢件事,相信日內就會有消息。
不過就算返唔到亞視,阿萊都可以喺車行幫老公手,唔使擔心冇嘢做。