喺2012年因為一場電視大戰，一度令娛樂圈風雲色變，唔少人以為電視史上會有一番景象，可惜最後因為「一男子」因素令不少人願望落空。直到2017年，兩間免費電視台ViuTV同奇妙電視先後啟播，似乎意味住喺不久嘅將來，將會有一番新景象。

林文龍同宣萱主演嘅TVB劇《不懂撒嬌的女人》，咁啱安排咗喺呢段時間播映，呢套被喻為非一般TVB嘅劇集，播出冇耐已經惹嚟唔少迴響，坊間仲掀起咗煲劇潮，林文龍日前喺尖沙嘴接受訪問，佢話：「當然希望佢哋有一啲新idea同好project，始終有競爭先有進步，不過我自己覺得今次TVB之所以咁大改變，佢哋睇到世界已經唔係以前嘅世界，日本、韓國已經過咗我哋好耐，大陸嘅市場又咁大，如果今日TVB仲係停留喺廠接外景，外景接廠，重覆又重覆嘅題材，已經唔再可行，我唔知會唔會再有《不懂撒嬌》呢個模式，但係肯定會向呢個方向有所改變。」

現階段林文龍除咗係演員之外，同時，佢仲係製作人，佢曾經投資拍過電影《我們停戰吧！》，套戲喺外國嘅影展奪得殊榮，投資開戲要好謹慎，做演員拍劇當然唔可以馬虎，所以林文龍話接劇要有好劇本先會考慮拍唔拍：「o依家做嘢就算邊間電視台，大前提要有好劇本，如果我今次返去，又係廠接外景，外景接廠，又係拍埋啲咁上下嘅劇情同角色，好老實我係唔會返去拍，我同關樹明（監製）又係咁講，Felix（杜之克）都係咁講。我離開咗TVB 9年，如果我淨係求拍嘢，根本唔應該走，當然錢亦都唔可以距離太遠。」

林文龍話：「今次係一個好大嘅加幅，係一個好大嘅尊重，以前TVB同你傾約，加你嗰一百幾十，已經好似皇恩大赦，但係今次嘅加幅，實際數字當然唔講得，但係講出嚟都唔會有人信佢哋會俾呢啲錢。當然同大陸劇仲有一段距離，呢個加幅，問心講，如果我一路留喺TVB，可能拍到我80歲死嗰日，都唔會有呢啲錢。」

話錢重要，但當有一大嚿錢邀請林文龍時，佢都有機會推：「上個月都有一套大陸劇搵我，假如為錢一定接咗，已經開咗工唔會仲喺香港，不過我係推咗，我唔係話劇本唔好，只係唔係我鍾意嘅嘢。呢幾年我都喺內地拍嘢，係講普通話，不過就算講得幾好，佢哋都會重新配音，我已經習慣，但係今次佢係現場收音，一來要做多啲功課，講好啲對白，最緊要嘅係呢個角色係專業人士，好多場口要有一大段專業對白，而呢啲對白係唔錯得，所以一定要死背，變咗我每日收工，就算幾攰都要做功課，所以最後決定推咗唔拍。」

服裝提供：Agnès b.
場地提供：The AIR (The ONE)