為人氣韓劇《鬼怪》演唱OST《Beautiful》嘅男歌手CRUSH，將於聽日喺九展舉行首個亞洲showcase「CRUSH ASIA SHOWCASE in Hong Kong」，今日CRUSH率先現身於鑽石山舉行嘅媒體見面會，跟粉絲打招呼。

晚上7時，CRUSH一現身即用廣東話打招呼：「大家好，我係CRUSH。」更即場學講廣東話「食咗飯未」及「我好掛住你」，大冧港迷。提到聽日嘅首個港騷，CRUSH表示：「準備咗好多，但唔公開住，當中有一部分特別為港迷準備。」CRUSH又表示平時愛聽8、90年代嘅soul music，從中得到靈感，另外佢平時愛帶狗散步，及跟好友Zico一齊玩。今年CRUSH於生日時出新歌，佢表示係送畀自己嘅禮物。CRUSH亦於台上清唱《Beautiful》，大哂歌喉。最後佢抽出幸運粉絲，送上禮物及合照。

於之後嘅訪問中，CRUSH先表示覺得好新奇，因為係首次出席商場活動。CRUSH更透露大概於下月13日左右推出新專輯，是次新碟亦會跟好多好朋友合作。問到於音樂上有咩目標時，CRUSH表示即使去到人生嘅盡頭，都想係仲做緊音樂，而4年前推出嘅專輯《Crush on You》內每首歌都好能代表佢。CRUSH話佢目前專注於音樂活動上，未有固定演出綜藝節目嘅想法，不過之前節目《無限挑戰》有搵過佢，好可惜當時未有演出。CRUSH話如果有機會，都想再跟方大同合作。

另外，CRUSH表示商場內有張Zico嘅廣告相，佢一直覺得Zico好似望實佢咁，又用廣東話笑言「（Zico）睥住我」，非常搞笑。

更多韓流，喺晒《娛果》
http://fb.com/appledailyent