遇事1歲大女嬰衞彩琳，與父母及祖父母同住南山邨南堯樓一單位，其父是酒樓廚房工人，母親原籍安徽，在本港誕下彩琳，現持雙程證來港照顧女兒。祖父稱：「孫女啱啱學識行路，好鍾意周圍走，我出街時都俾佢阻住門口。」
昨事發中午12時許，祖父外出飲茶，祖母往覆診及交煤氣費，父親一早上班，家中剩下彩琳及母親，而祖母離家前洗完衫，囑咐姓蕭媳婦（24歲）晾衫。現場消息指，蕭婦在廚房晾衫時，彩琳在附近玩耍，廚房灶頭下有一個膠箱，裏面放有用膠樽裝載、一片片固體形狀的哥士的。

據稱，家人早前以每樽2.5元從五金舖買來哥士的用作通渠，大部份已用罄，祖母事後說：「上次用完個蓋擰得唔緊，個膠箱又冇蓋，孫女好易攞到嚟玩。」當時蕭婦忙於晾衫，未有察覺女兒，懷疑她將蓋擰開拿起哥士的往嘴裏送，即時被灼傷嚎啕大哭。
母親聞訊立即將她抱起，發現她口腔、嘴唇及臉頰紅腫，前額及大腿亦有傷痕，懷疑被哥士的沾到灼傷。蕭婦大驚向鄰居求助並通知家人，鄰居用大量清水替彩琳清洗傷口。祖母說：「嗰時B女喊到收唔到聲，嘴唇腫到好似孖膶腸咁，佢好百厭乜嘢都搞，周不時入廚房開煤氣掣、微波爐掣，冇諗過今次搞出咁大件事。」
事後家人報警將彩琳送明愛醫院救治，再轉瑪麗醫院燒傷中心治理，情況穩定。祖父昨晚透露，彩琳的嘴唇已消腫，「今次係媳婦疏忽，相信孫女冇吞到落肚，如果食咗仲點識喊？」警方將事件列疏忽看管兒童處理，暫未拘捕任何人。
哥士的學名氫氧化鈉（SodiumHydroxide），屬強鹼性，有腐蝕性，曾近榮早年常在電視上介紹。「曾Sir」昨晚表示，當年在無綫演趣劇，飾演校長，女星恬忸做學生，介紹哥士的用途，自此被廣泛介紹。香港科技普及協會會長曹宏威稱，哥士的遇水即釋出熱力，溶解成為腐蝕性液體，可作通渠及去污之用。

「一至兩歲嘅小朋友，最有興趣用手探索周圍物件，家長要將危險品放喺佢哋攞唔到嘅地方。」對於1歲女嬰誤食哥士的，兒科醫生陳以誠指出，不少家居意外都是家長疏忽所致，「好似今次家長如果將哥士的擺高啲，就唔會有事發生。」
陳以誠醫生表示，家中任何地方包括地板、梳化、枱凳、茶几等，小朋友有可能攀爬及用手摸到。利器、藥物及滾水等有潛在危險的物品，都要放在小朋友摸不到之處，「佢哋特別對樽內嘅嘢有興趣，藥丸當餅亁，藥水當果汁，畀佢哋打開蓋，就一定塞落口。」如果兒童不慎吞食哥士的，家長可嘗試給他們餵奶，並拍背令兒童嘔出奶水，跟着再餵奶，以保護胃部及食道。
本報記者