新天綠色能源（956）喺同級行家中，PB至平，又計埋內資股嘅總市值，都係得32億元，呢期集團兼有勢壯大主打瓣數，翻一番計，市值、PB都未有耐追大部份行家同姐妹系！
新天綠色係河北省最大風電企業，同最大天然氣分銷商，阿媽河北建投，由河北省國資委履行監管。新天綠色上年盈利倒退50%，到近1.7億元人仔，但集團現價0.86元，比2014年高位3.86元，累跌近80%，今年以嚟，亦累跌咗近30%，插到落五年兼上市以嚟低位，都反映得七七八八八。再講，新天綠色母系夠實力，又專業預估集團今年turnaround，EPS增長近80%到9.5港仙，預測8.9倍PE。
新天綠色呢個殘價嘅今年預估0.35倍PB，總市值32億港元。姐妹系建投能源（深：000600），市值約200億港元，係新天綠色市值6.3倍，預估1.4倍PB。新天綠色PB，足足平咗75%！
又行家金風科技（2208）由2月短期底到家陣累升54%，市值487億港元；預估1.56倍PB的龍源（916）同期升52%，市值465億港元；近1倍PB的華電褔新（816）升70%，市值近170億港元，0.72倍PB。新天綠色PB、市值，又係平絕。