同非財經界朋友傾開股票，小弟向來不多加把嘴，由得友人自high。其中一位友人無論喺牛市定熊市，多年來只得一個策略，就係大跌市時恐慌性買入，過去牛市時等待，現在熊市時，繼續等待。至於選股，就打算買跟市走嘅二三線股，長線等待股票翻倍。

聽起上嚟冇乜錯，何謂恐慌性買入？朋友給出恒指15,000點係撈底價，理由好簡單：「熊市股市會由高位跌五成。」明晒，傳統智慧。

15,000點係乜嘢情況，首先係恒指市賬率0.7倍，你可以用70蚊價格，去買100蚊嘅藍籌資產，係假設未來恒指成份股會連年蝕錢，又或者資產價格不斷萎縮，令到藍籌揸住嘅資產值由原本嘅100蚊跌到去70蚊。畀個參考大家，恒指喺97年至03年樓市泡沫爆破期間，藍籌資產值由高位跌四成，講緊當年地產股喺藍籌比例高過而家多多聲。當然，而家內銀資產有幾多壞賬等住撇，係另一個等住大審判嘅命題。

香港上市藍籌，係收集咗好多香港人、中國人嘅勞動力、搵錢智慧、解決問題能力、最高薪高層嘅管理能力…。至少，讀者們身處嘅公司，大多數都係長期有賺錢吧，否則一早執咗，小弟服務嘅公司當然除外。要設定恐慌買入價，點都要考慮現實世界情況，否則撈底就淪為口號了。

晉佳

https://www.facebook.com/advanceguy1