自從本港疫情爆發兼封關，港交所（388）自3月底開始取消現場上市儀式，對公司嚟講係一個遺憾，始終掛牌一刻敲大銅鑼意義非凡，唔知係咪因為咁，最近有間新上市公司自己喺內地搞個「山寨」上市儀式，慶祝一下。

本來呢件都無可厚非，但有啲公司就太認真，道具做得太逼真。好似內房股港龍中國地產（6968），銅鑼嘅木架就印上「香港交易所」及「HKEX」logo。據了解，公司使用港交所商標前冇得到港交所同意。又好似大山教育（9986），舞台背景同港交所平日舉行上市儀式嘅backdrop激似。

呢股風氣，翻查資料由京東（9618）帶起，之後上市嘅例如華夏視聽（1981）、正榮服務（6958）、渤海銀行（9668）等，都會自行搞個上市儀式。不過，佢哋就比較醒目，冇用到港交所logo。上市公司通常都係喺租間酒店宴會廳，地方夠大，又可宴請大量賓客，最重要有個超大銅鑼畀管理層敲。驟眼睇，真係同港交所嘅上市儀式冇分別，甚至係更豪華。再一次印證馬雲話：「假貨做得比真品還好。」

巧合地，搞呢啲「老翻」上市儀式嘅，都係同一間公關公司皓天。不過，皓天已經向華華否認同事件有關，又話無協助及參與容戶喺內地舉辦嘅上市儀式，仲話事前已提醒客戶，唔可以隨意使用港交所嘅商標。

港交所話，已安排網上雲敲鑼儀式讓發行人慶祝上市嘅大日子。發行人若果選擇自行慶祝上市，相關儀式不得以港交所名義舉行，或使用港交所嘅品牌。

其實華華都好明白上市公司管理層嘅心情，扔幾千萬搞上市，最風光果刻就係喺港交所大堂敲鑼影相，點知依家失去咗呢個威威嘅機會。希望疫情快啲過去，嚟緊嘅新股可以正正式式敲響港交所個銅鑼啦。

李華華