自拍、影食物、展示靚衫，絕對唔係後生女嘅專利，連啱啱生日67歲嘅李司棋都加入咗呢個行列，最吸引人睇嘅嗰張相，係輕輕咬住條薯條…（新聞連結： http://bit.ly/2xAwQiS ）

李司棋同蘇玉華今日暫時放下綵排舞台劇《小城風光》嘅工作，去到新城宣傳，司棋姐喺今個月2號開咗Ig賬戶，成功以黑絲、眼鏡娘look、輕咬食物等等招數，吸引咗唔少人Follow。今日司棋姐再以黑絲示人，佢解釋原來對絲襪對有情意結，佢話：「以前成日會着，不過當時係白色，但o依家着白色會好肥。」

司棋姐話原本唔接觸網上平台，只因為有幕後指佢為人風趣，有別於平時演嘅角色，所以令以往唔鍾意展露私下一面畀人睇嘅司棋姐，打開心扉同大家分享日常生活，佢話：「我試過食完先記得影嘢食，要習慣吓，不過就唔會專登花錢買衫嚟影。」蘇王華本身都有社交平台賬戶，不過佢唔會洩漏行蹤，只會事後上載相片或者分享感受。

講番今次舞台劇《小城風光》，原來對兩人係一大考驗，因為記對白之餘，佢哋喺台上要喺無道具下做動作，如煮早餐、執屋等，要兼顧肢體動作之餘，又要接對方對白，緊接演出唔可以甩漏，所以o依家要每日排練8小時。網上資料顯示噚日係司棋姐生日，原來係一個美麗誤會，佢話：「之前寫我農曆八月十五，其實係十三，不過啲人話唔好改前兩日，好似短咗兩日咁，所以啲人根據八月十五搵番新曆，其實邊日都冇所謂，生日係開心。」