羅蘭姐今晚出席喺金鐘舉行嘅雜誌頒獎禮，獲頒成功女性大獎，陳嘉桓（Rose）同何國鉦（Dorian）出席晚宴支持。提到獲成功女性大獎，羅蘭姐謙稱：「唔敢當，我只係個平凡女性，喺演藝圈半世紀，呢個係我嘅工作一部份，喺我定義唔可以話係成功，劇本好笑我就演得好笑，多謝觀眾一直愛戴。」

羅蘭姐話越來越鍾意演藝工作，佢話：「唔知點解越嚟越鐘意，有時睇到第二啲戲，會諗如果畀我做會做成點呢？咁係咪即係好鍾意？但冇辦法脫離『龍婆』嘅形容，好多人話轉咗就唔係『龍婆』嘞。」

另外，Dorian近來忙住同其他品牌搞crossover，繼設計珠寶，嚟緊會同一個瑞士名錶品牌推出情侶手錶系列，另方面又會帶返Rose出嚟，Dorian話：「9年前我係做Rose嘅image，帶佢出嚟介紹畀大家識，但係中間佢返咗大陸，我好唔甘心㗎，佢o依家先25歲，因為佢好有條件，最近返番出嚟喇！嚟緊會拍《反黑》第二季，因為佢有時好懶，所以我要鞭策住佢，要佢減肥。」而着上極低胸晚裝嘅Rose就話o依家129磅，已經比最重時輕咗8磅，未來要再減多8磅先達標，佢話：「o依家有健身做瑜伽同練功，之前比人笑我得事業線，o依家我要練埋馬甲線，因為都有人搵我拍動作片，主要係網絡電影同劇為主。」

精選娛聞，喺晒《娛果》
http://fb.com/appledailyent