冧班如何煉成一個社工？可能要問問張國柱，呢名社福界前立法會議員，試過逢三進一。阿柱6、7歲時隨家人從廣州來港，定居上環，小學讀過好幾間，最後落腳英皇書院同學會小學，小六會考失敗，連續冧班兩年，第三次讀小六先考到英皇書院，同689、即係前特首梁振英做同學。
雖然同校兼同級，但阿柱同梁振英唔熟，反而畢業後曾聚頭合作查案。阿柱話當年有個同學考上政府EO，派咗去警察部，但有日返工途中被發現從天台墮下，警察話係自殺，「我哋梗係唔信」，因為當時廉政公署剛成立，巧合得令人懷疑，幾個同學包括梁振英坐低一齊傾，尋找蛛絲馬迹，最終不了了之，「完全搵唔到真相，我哋只得懷疑」。

中二再冧班　中五又止步

講返冧班，又豈止逢三進一。英皇以英語授課，阿柱當年英語較遜色，適應困難，結果中二再冧班，讀到中五又止步，「爭一科合格升唔到」，轉去新法書院重讀一年，後來報讀社工工作訓練學院，1975年畢業後到明愛做社工，一做就34年。
冧班煉成阿柱嘅堅毅不屈，不輕言放棄，加上佢中學時常到贊育服務處做義工，從而了解到社工係幫人嘅工作，就決定終身以此為業。2009年阿柱當選社福界立法會議員，2014年佔領運動期間確診患上惡性胃黏膜淋巴瘤，佢先發現「原來好多人關心自己」。