都說樓市太瘋狂，全城最猛凶宅都坐地起價！繼北角富澤花園一個凶宅單位上周呎價過萬沽出，「凶宅大王」陳應佳揸住嘅荃灣中心六屍凶宅王，雖然放咗成年都未賣得出，但早兩日竟然加價，由170萬加到200萬，加幅接近18%。
呢個六屍凶宅，係佳叔舊年5月喺拍賣場上以118.5萬元投得。佢一副不志在咁話「200萬都係嗌住先」，指個凶宅收緊租，冇有怕，加上單位仲未坐完兩年「SSD監」（兩年內轉售單位，政府徵收最多15%額外印花稅），200萬賣到就賣，否則繼續揸住收租。

基督徒租緊　連約放售

聽講，呢個單位家租畀一位百無禁忌嘅基督徒，月租5600蚊，佳叔連租約放售，若成功以200萬（呎價4082）沽出，佳叔賬面賺81.5萬。
地產代理講，同類非凶宅單位現市值約280萬。
佳叔之所以被人叫做「凶宅大王」，皆因佢專吼大低水嘅凶宅，高峯期持有8至10個凶宅單位，家陣得番荃灣中心一件貨咋。
呢個單位，1996年有租客喺屋內開煤氣同太太、三名仔女同埋兩名表弟集體自殺，結果租客獲救，其餘六人慘死，轟動全港。區內代理直情話，單位實在「太猛」，銀行做唔到按揭，幾平都好，好難搵客。
另一著名凶宅──九龍灣德福花園五屍命案單位新近亦將叫價加到300萬（呎價4800），係五個月內四度加價，原先叫價238萬，加幅達26%。凶宅都話要炒起，CY同茂波幾時先至「做實事」呢？

李華華
mailto:[email protected]