蔡卓妍（阿Sa）今日喺灣仔出席電影《神探大戰》嘅煞科宴，同場仲有主演嘅劉青雲、林峯同老闆楊受成等，阿Sa笑言今日出席煞科宴有劫後重逢嘅感覺：「成個劇組一齊經歷咗4個月，拍嗰陣係冬天，又要跳海又要行屎渠。」好彩阿Sa嘅辛苦都有回報，佢獲青雲讚：「唔係夾硬讚佢，呢部戲真係好多平時睇唔到嘅佢。原本我有啲擔心阿Sa，佢未必好明拍緊咩，最驚險係佢要揸快車。」

阿Sa又話拍攝期間有想死嘅感覺：「真係覺得生命冇take two，平時拍嘢會諗定幾個方法，演幾次畀導演揀，今次顧唔到咁多。有一幕係我被人用保鮮紙包住個頭，劇組好好喺鼻嗰個位篤兩個窿畀我透氣，但導演話唔得，鏡頭睇到，嗰個shot拍咗差唔多一分鐘，拍完我真係好想嘔。」

阿Sa仲話因為每日去到現場，先有最新嘅劇本，頭一個月好大壓力：「我直頭懷疑過自己唔識做戲，大壓力到個樣灰咗。」

講到好姊妹鍾欣潼（阿嬌）噚日註冊榮升賴太（新聞連結： https://bit.ly/2BuyCDa ），佢話好開心：「美國嗰次好激動，噚日冷靜啲，好開心。」至於另一姊妹周勵淇（Niki）自爆婚訊（新聞連結： https://bit.ly/2ClmTse ），阿Sa透露見過Niki老公傅浤鳴，仲話對方「幾好呀」，但對於Niki被指係第三者搶人老公？阿Sa話：「時間嘅嘢我唔知，每個人都有過去，唔好成日執住人哋嘅過去，結婚係開心事，祝福啦。」

另外，楊受成對於旗下藝人陸續出嫁，佢話：「最好嫁啦，呢個年紀搵到啱就嫁，女大不中留，不過我唔會催佢哋，個個都合作10幾年，對公司好大貢獻。」講到仲有容祖兒同阿Sa仲未嫁人？楊受成話：「希望佢哋快啲，早日搵到個好歸宿。」提到Niki結婚，佢透露有同Niki老公食過飯，亦讚佢份人幾好。

精選娛聞，喺晒《娛果》
http://fb.com/appledailyent